Шупашкарти Калинин урамӗнчи складсенчен пӗринчен оргтехника вӑрланӑ. Пӑтӑрмах пирки йӗрке хуралҫисене пӗлтернӗ.
Вӑрӑ чӳрече кантӑкне ватса кӗнӗ иккен. Фирма 200 пин тенкӗлӗх шар курнӑ.
Пакунлисем вӑрӑ йӗрӗ ҫине часах тухнӑ. Вӑл ҫын Ҫӗнӗ Шупашкарти 38 ҫулти арҫын пулнӑ. Вӑрланӑ тавара вӑл Ҫӗрпӳ тӑрӑхӗнче пытарнӑ. Пытарса пӗтерейменнине ҫывӑхри пӗвене янӑ-мӗн.
Арҫын тӗлӗшпе пуҫиле ӗҫ пуҫарнӑ.
Чӑваш Енре хутӑш чӑвашсен «Тапӑ» фестивалӗ иртнӗ. Вӑл Тӑвай округӗнче пулнӑ.
Фестивале тӗрлӗ округран килнӗ: Вӑрмар, Куславкка, Шупашкар, Сӗнтӗрвӑрри, Ҫӗрпӳ, Красноармейски тӑрӑхӗсенчен. Вӗсем историпе, йӑла-йӗркепе, ӳнерпе пайланма пухӑннӑ.
Фестивале хутшӑнакансем тӗрлӗ инструмент каланӑ, юрланӑ, историсем каласа кӑтартнӑ. «Алран кайми аки-сухи» юрлани чи хумхануллӑ самант пулнӑ.
Тӑвай округӗнчи Татьяна Юркина сыр пӗҫерес енӗпе чӑн-чӑн ӑста. Качотта, сулугуни, халуми, ламбер… Тӗрлӗрен сыр хатӗрлет вӑл.
Татьяна Пӗтӗм Раҫҫейри «Ӗҫ ҫыннисем» конкурса хутшӑнма заявка панӑ. Вӑл «Ӗҫлӗ хӗрарӑм» номинацире тупӑшӗ.
Татьяна Юркина хӑйӗн ӗҫне аталантарма патшалӑхран пулӑшу илнӗ. 2023 ҫулта унӑн предприятийӗнче 800 килограма яхӑн сыр тунӑ. Кӑҫал вара ку кӑтартӑва тата пысӑклатасшӑн. Унӑн сырӗсене Вӑрмар, Тӑвай, Канаш Ҫӗрпӳ, Патӑрьел округӗсенче, Шупашкарта, Ҫӗнӗ Шупашкарта пурӑнакансем юратса ҫиеҫҫӗ.
Массӑллӑ информаци хатӗрӗсенче Ҫӗрпӳ округӗнче биологи каяшӗсен купи пулни пирки хыпар сарӑлнӑ. Россельхознадзорӑн Чӑваш Енри специалисчӗсем вырӑна тухса тӗрӗсленӗ те ҫав вырӑнта чӑнах та выльӑх виллисем, шӑммисем йӑваланнине палӑртнӑ.
Вӗсем уҫӑ вырӑнтах выртнӑ. Ку вара – ветеринари саккунӗсене пӑсни. Ведомство ҫӗр харпӑрҫине – Ҫӗрпӳри ветеринарипе санитари утилизаци савутне – ҫитменлӗхсене пӗтерме хушнӑ. Ку савут Янсакассинче вырнаҫнӑ.
Тӳре-шара Ҫӗрпӳ округӗнчи Чурачӑк шкулӗ ку вӗренӳ ҫулӗ тӗлне уҫӑласса шантарнӑччӗ. Анчах вӑл уҫӑлман.
Пӗлӳ кунӗнче уяв линейки ҫӗнӗ шкул умӗнчех иртнӗ, анчах ачасем халӗ те киввинчех вӗренеҫҫӗ. Вӑл авариллисен йышӗнче шутланать.
375 вырӑнлӑ ҫӗнӗ шкула 2023 ҫулхи пуш уйӑхӗнче тума тытӑннӑ. Ӑна планпа кӑҫал утӑ уйӑхӗн 31-мӗшӗнче хута ямалла пулнӑ.
Ҫурла уйӑхӗн 10-мӗшӗнче Красноармейски округӗнчи Чатукассинче «Тунти пуххи» иртнӗ. Унти ял тӑрӑхне кӗрекен кашни ял хӑйсен картишне йӗркеленӗ, пултарулӑхне кӑртартнӑ. Вӗсене жюри хакланӑ.
Шкул стадионӗнче вара ӑмӑртусем иртнӗ: шашкӑлла, футболла, волейболла вылянӑ, вӗрен туртнӑ. Кашни командӑнах медальпе, пылак парнепе хавхалантарнӑ. Чи пултаруллӑ ял ятне Ҫӗнӗ Выҫҫӑлккӑ илнӗ, вӑл кубока тивӗҫнӗ. Спорт кубокӗ вара Чатукассине лекнӗ.
Сцена ҫинче вара концерт пулнӑ. Унта вырӑнти «Телей» ансамбль тата Ҫӗрпӳ округӗнчи Патӑрьел ялӗнчи пултарулӑх ушкӑнӗ юрласа ташланӑ.
Ҫӗрпӳ округӗнчи Пысӑк Чӑрӑш ялӗ ҫывӑхӗнче карьер пур. Унтан вак чул кӑлараҫҫӗ.
Хальччен нумай чул кӑларнӑ. Шӑтӑка каялла вара ҫӳп-ҫаппа хуплама шутланӑ ахӑртнех.
Ҫывӑхра вара - ял, уй-хир, Кӗҫӗн Ҫавал юханшывӗ. Ҫынсем 300 метр аякра ҫеҫ пурӑнаҫҫӗ. Ҫывӑхра ҫӳп-ҫап купи пулни, паллах, лайӑх мар.
Ял ҫыннисем унсӑрӑн та кӑмӑлсӑр: ҫывӗпех карьерта чакаланакан машинӑсен сассине итлесе пурӑнаҫҫӗ. Ку хӑҫанччен ҫапла пулӗ? Юре-ха, вак чул кӑлараҫҫӗ, анчах унта мӗн тума ҫӳп-ҫап турттармалла? Ҫакӑ пӑшӑрхантарать ял ҫыннисене.
Паян ҫӑлав службине Ҫӗрпӳ округӗнче ҫын путса вилни пирки шӑнкӑравласа пӗлтернӗ. «Асамат» турбаза ҫывӑхӗнчи пӗвере, Ҫӗньялта, 41 ҫулти хӗрарӑм шыв айне кайнӑ. Вӑл Красноармейски округӗнчен пулнӑ.
Ҫак инкеке курнӑ ҫынсем каланӑ тӑрӑх, хӗрарӑм кимӗпе ярӑннӑ, ҫаврӑнса ӳксен вӑл шыв айне кайнӑ та тухман. Унӑн виллине водолазсем шыраҫҫӗ.
Палӑртмалла: ҫулталӑк пуҫланнӑранпа республикӑра 27 ҫын путнӑ. Ҫав йышра - 3 ача.
Паян Ҫӗрпӳ муниципаллӑ округӗн пуҫлӑхн ҫумӗ пулса 53 ҫулти Ольга Чепрасова ӗҫлеме тытӑннӑ. Вӑл вӗрентӳпе тата социаллӑ ӗҫпе ҫыхӑнну ыйтусемшӗн явапли пулӗ.
Вӑл хӗрарӑм 2020 ҫулхи чӳк уйӑхӗнченпе Шупашкар мэрӗн социаллӑ ыйтӑвӗсемпе ӗҫлекен ҫумӗ пулнӑ, 2017-2020 ҫулсенче — Ҫӗнӗ Шупашкар администрацийӗн пуҫлӑхӗ.
Паян Ҫӗрпӳ округӗнчи Виҫикассинче 9 ҫулти арҫын ача путса вилнӗ. Вӑл путни пирки ҫӑлав службине 15 сехет те 45 минутра пӗлтернӗ.
Ачан виллине пӗр сехетрен тӑванӗсем шыраса тупса ҫыран хӗррине илсе тухнӑ. Халӗ ӗҫ-пуҫа уҫӑмлатаҫҫӗ.
Аса илтерер: кӑҫал ҫулла Шупашкарта Атӑлта 13-ри хӗрача, 14-15 ҫулсенчи икӗ арҫын ача путса вилнӗ.
+6.3 °C